62 ఏళ్ల అమిత్ షా: డయాబెటిస్‌పై విజయం.. ఆయన ఫిట్‌నెస్ రహస్యం ఇదే!

కేంద్ర హోంమంత్రి అమిత్ షా నిన్న 62వ పుట్టినరోజు జ‌రుపుకున్నారు. ఈ సంద‌ర్భంగా ఆయన ఆరోగ్య ప్రస్థానానికి సంబంధించిన ఆస‌క్తిక‌ర విష‌యాలు వెలుగులోకి వ‌చ్చాయి. కొన్నేళ్లుగా తన జీవనశైలిలో మార్పులు చేసుకుని, 20 కిలోలకు పైగా బరువు తగ్గడమే కాకుండా, డయాబెటిస్‌ను కూడా నియంత్రణలో ఉంచుకున్నారు. ఆయన అనుభవాలు ఎందరికో స్ఫూర్తినిస్తున్నాయి. 

2020 మేలో తన జీవనశైలిని మార్చుకోవడం ప్రారంభించినట్లు అమిత్ షా గతంలోనే తెలిపారు. ఈ మార్పుల ఫలితంగా ఆయన ఆరోగ్యం గణనీయంగా మెరుగుపడింది. 2025 ఏప్రిల్ లో న్యూఢిల్లీలోని ఇన్‌స్టిట్యూట్ ఆఫ్ లివర్ అండ్ బిలియరీ సైన్సెస్ నిర్వహించిన ఓ కార్యక్రమంలో షా తన ఆరోగ్య రహస్యాలను పంచుకున్నారు. 

సరైన నిద్ర షెడ్యూల్ పాటించడం, రోజూ తగినన్ని నీళ్లు తాగడం, ఆహారంలో మార్పులు చేసుకోవడం, క్రమం తప్పకుండా వ్యాయామం చేయడం వంటి నాలుగు సూత్రాలు తన జీవితాన్ని మార్చాయని ఆయన వివరించారు. ఈ మార్పుల వల్లే తాను గత నాలుగున్నరేళ్లుగా డయాబెటిస్ కోసం ఎలాంటి అల్లోపతి మందులు లేదా ఇన్సులిన్ వాడటం లేదని స్పష్టం చేశారు.

ఈ అనుభవంతోనే యువతకు ఆయన కీలక సలహా ఇచ్చారు. ప్రతీరోజూ శరీరం కోసం రెండు గంటలు వ్యాయామానికి, మెదడు కోసం ఆరు గంటలు నిద్రకు కేటాయించాలని సూచించారు. ఈ దినచర్య వల్ల తన పని చేసే సామర్థ్యం, ఆలోచనా శక్తి, నిర్ణయాలు తీసుకునే సామ‌ర్థ్యం ఎంతో మెరుగుపడ్డాయని అమిత్ షా పేర్కొన్నారు.

అయితే, వైద్య నిపుణులు ఈ విషయంలో కొన్ని ముఖ్యమైన విషయాలను గుర్తు చేస్తున్నారు. డయాబెటిస్ నియంత్రణ అనేది వ్యక్తికి వ్యక్తికి మారుతుందని, వైద్యుల పర్యవేక్షణ లేకుండా మందులను మార్చడం గానీ, మానేయడం గానీ అత్యంత ప్రమాదకరమని హెచ్చరిస్తున్నారు. టైప్ 2 డయాబెటిస్ ఉన్నవారిలో బరువు తగ్గడం వల్ల రక్తంలో గ్లూకోజ్ స్థాయులు మెరుగుపడే అవకాశం ఉన్నప్పటికీ, ఫలితాలు అందరిలో ఒకేలా ఉండవని, నిరంతర వైద్య పర్యవేక్షణ తప్పనిసరి అని స్పష్టం చేస్తున్నారు.